AMFANIN KANWA A RAYUWAR DAN ADAM
Amfanin kanwa a rayuwar ɗan Adam
Wani nau'i na kanwa da aka samu a garin Vielsalm na ƙasar Belgium
Kanwa suna ne da ake kiran rukunin ma'adanin ƙasa ko sinadarai da ke ƙunshe da sinadarin potassium, wanda ke gina jikin tsirrai.
Ana iya cewa babban amfanin kanwa a fannin masa'antu shi ne haɗa takin zamani.
A fannin lafiyar ɗan Adam kuma, sinadarin potassium na da muhimmanci wajen haɓaka gaɓɓai da kuma naman jikin mutum, har ma da wani ɓangare na ayyukan zuciya.
Sai dai wasu masana lafiyar abinci sun ce rashin amfani ya fi amfaninta yawa game da yadda mutane ke sha da kuma amfani da ita a abinci.
Ana haƙo kanwa ne a wuri mai dausayi.
Ƙasashen da suka fi samar da kanwa a duniya
Yadda ake haƙo kanwa a ƙasar Canada a shekarun 1970
Shafin intanet na gwamnatin ƙasar Canada ya bayyana cewa ƙasar ce ta fi kowacce haƙowa da fitar da kanwa a duniya.
Canada na fitar da kashi 31 na kanwar da ake cinikayayya a duniya duk shekara ya zuwa 2020. Ƙasashen su ne:
- Canada - tan miliyan 21,97,531
- Rasha - tan miliyan 13,81,620
- Belarus - tan miliyan 12,205,17
- China - 7,195,10
- Isra'ila - l3,830,5
Hanyoyin gargajiya da mutane ke amfani da kanwa
Wasu daga cikin hanyoyin da mutane ke amfani da kanwa a gargajiyance sun ƙunshi:
- Ana kaɗa kanwa a ruwa a sha don magance ƙwarnafi ko ciwon ciki.
- Ana sha don wanke wanke mara
- Takan taimaka wa masu matsalar fitsari
- Ana amfani da ita wajen dafa wake don ya yi laushi
- Akan zuba ta a abinci don kashe tsamin abinci
- Akan sha kanwa bayan an ci abinci don ta hana runkucewar ciki.
'Rashin amfanin kanwa ya fi amfaninta yawa a jikin mutum'
Kanwa na ƙunshe da sinadarin potassium da ke haɓaka tsoka da gaɓɓan jikin ɗan Adam
A gargajiyance, kowane yanki na duniya da ƙabilu na da hanyoyin da suke sarrafa ta don amfanin ɗaiɗaikun mutane ko kuma na al'umma.
A ƙasar Hausa da sauran akan yi amfani da kanwa ta hanyoyi da dama, sai dai akasarin abubuwan da mutane ke yi da ita bai samu goyon bayan kimiyya ko likitoci ba.
Ƙwararriya kan lafiyar abinci kuma malama a kwalejin koyarwa ta Jihar Kano, Malama Halima Adamu, ta ce kanwa na kashe sinadaran da ke gina jiki a abinci.
"Mutane ne ba su sani ba, kanwa ba ta da wani amfani a abinci, hasali ma tana rage wa abincin fa'ida ta hanyar kawar da sinadaran da ke gina jiki a ciki," in ji ta.
A cewarta: "Ka san shi malam Bahaushe na da tunanin cewa duk abin da yake da amfani to babu laifi a saka shi a abinci.
"To amfaninta kawai shi ne sanya ta da ake yi don ta sa abu ya yi laushi.
"Dalilin da ya sa ake sakawa a abinci shi ne saboda sinadarin alkaline kuma ba dole sai a kanwa ake samun sa ba.
"Zai yi kyau idan an saka kanwa a abinci to a zuba ganyayyaki da sauran kayan marmari a ciki saboda a cike gurbin sinadaran da kanwar ta lalata masu gina jiki."
'Gara a yi amfani da dalam'
Malama Halima Adamu ta ce akwai wani gari da ƙabilar Fulani ke haɗawa da ya fi kanwa amfani mai suna dalam.
"Fulani kan yi amfani da kararen gero da dawa da masara wajen garin dalam kuma shi ma ana amfani da shi kamar yadda ake amfani da kanwa," a cewarta.
"Dalam ya fi kanwa amfani saboda ba a cire komai daga cikin sinadaran hatsin ba."
Abubuwan da ake sarrafawa da kanwa
Kamar yadda muka faɗa a sama, kashi 95 cikin 100 abubuwan da ake sarrafawa da kanwa a fannin masa'antu shi ne haɗa takin zamani.
Sinadarin potassium da ke cikin kanwa kan gina jikin tsirrai, da ba su garkuwa daga cutuka, da alkinta ruwa a jikinsu.
Akan yi amfani da kanwa ƙalilan wajen samar da kayayyaki masu ƙunshe da sinadarin na potassium kamar:
- Garin sabulu
- Tangaran da tukwane
- Ƙwayoyin magani
- Sinadaran tsaftace ruwa
- Ana amfani da kanwa wajen fasa ƙanƙasa.
Comments
Post a Comment